迴響 35

◆點解仲要出書？【余兒．喬靖夫．曹志豪．沈西城．潘牧雲．藍橘子】

隨書附送：【聲紋 x 迴響】李白 Brad Li 明信片
 

今期《迴響》重拾初衷，一齊回想當初出書嘅原因。

出版有一種魔力，由企劃到落手寫作，到設計編排，到印刷對色，再推出市場，諗吓點樣推廣，最後喺書店見到自己本書，係咪特別滿足？
可能寫作嘅人就係追求緊一種滿足感，無論自我滿足，定係嚟自市場對自己嘅反應，或者係一個讀者嘅回應都好，已經係一份動力。

人類自從發明咗文字，書刊就係文化嘅累積，流傳千百年不衰。
今日我哋可以閱讀幾十年前、幾百年前，甚至幾千年前嘅文字，因為書刊得以流傳。
舞台劇《南海十三郎》入面有一句對白：「我要證明文章有價，一曲千金」，大概亦係劇作家透過角色想傳達嘅訊息。

今時今日，出版好易，出版好難。
出版技術易咗，人人都可以自資出書；讀者喜好多咗，去少咗書店買少咗書。
以前喺香港，好賣嘅作品閒閒地六位銷售數字，今日出版嘅話要諗吓出五百本係咪太冒險。
不過我哋依然相信紙本有力量，係其他媒介無法取代嘅。
讀者少咗，大家對書刊嘅要求反而更加高，點樣做好每一本書，相信係每個出版人都面對緊嘅課題。
出版人，加油。
謹以今期《迴響》共勉。